Општина Охрид нема да финансира концерти на продукции, Охрид Колинг неизвесно е дали ќе се оддржи

Советот на Општина Охрид на вчерашната седница со 20 гласа го поддржа предлогот на в.д. градоначалникот Константин Георгиески од општинската каса да не се издвојуваат средства за кофинансирање и субвенционирање концерти и забавни содржини во шпицот на туристичката сезона, поточно во периодот од 15 јули до 15 август.

Со таквата одлука прекинува практиката воведена од пред неколку години на приватни компании и продукции да им се даваат поволности при организирањето концерти во денови кога градот и онака е полн со туристи, туку поддршка да се дава на манифестации што во иднина би придонеле за продолжување на сезоната во градот.

Само во 2018 година за организирање концерти и други забавни содржини од градската каса биле издовени околу седум милиони денари.

Инаку пред неколку денови во јавноста излезе информацијата дека е неизвесно оддржувањето на Охрид Колинг закажано од 1 до 4 август во Охрид на стадионот Билјанини извори. Од Авалон продукција истакнаа дека деновиве ќе бидат познати деталите додека пак од Општина Охрид ја обвинија продукцијата за нерегуларности и ненавремено подмирување на сметките.

- Приватна продукција што неколку години наназад заедно со Општина Охрид организираше концерти се уште не ги има подмирено сметките за користење на стадионот „Билјанини извори", за што против продукцијата е покрената пријава. Истата продукција од општинскиот „Црвен крст" беше обвинета дека ја избегнува законската обврска дел од средствата остварени од продажбата на билети за концертите да ги уплатат за хуманитарни цели односно на сметката на Црвениот крст, истакнаа од општината.