Росоманец го изгуби домот во пожар, Општината му обезбеди ново живеалиште

За жителот од Росоман кому деновиве куќата му изгоре во пожар, Општината обезбеди ново живеалиште.

Како што информира денеска росоманската локална самоуправа, на росоманецот му е даден објект за сместување во непосредна близина на опожарениот дом, а овозможено му е и да биде згрижен.

Според Територијалната противпожарна единица Кавадарци, пожари континуирано се случуваат, најмногу како последица на несовесно палење на отпадот од лозјата. Оттаму повикаа на поголема внимателност и одговорност.

Портпаролот на Секторот за внатрешни работи, пак, Верољуб Додевски, информира дека деновиве настанал пожар и на помошен објект – казарница во двор на куќа во кавадаречко село. Пожарот во кој била предизвикана материјална штета, е локализиран од Противпожарната единица Кавадарци и извршен е увид на местото.