Виничките пожарникари локализираа пожар на депонијата кај селото Лески

Екипи од Територијалната противпожарна единица од Виница денеска го локализираа големиот пожар што избувна на депонијата за комунален отпад кај селото Лески. Огнот беше забележан вчера претпладне, а густиот чад за кратко време се прошири над целата котлина, целосно прекривајќи ги населените места од тој регион, при што стигнал дури до општина Карбинци.

Командирот на ТППЕ – Виница, Станко Спасов, информираше дека практично целата депонија била запалена и на повеќе места имало високи пламени јазици што излегуваат од отпадот.

-Нашите пожарникарите интервенираа во изминатото деноноќие, при што за гаснење употребимве вкупно десет цистерни, а со предизвикување контра пожар успеавме огнот да го задржиме во рамки на депонијата. Гаснењето со вода е неефикасно, поради специфичноста на локацијата и за целосно задушување на огнот вршевме затрупување со земја за да се оневозможи пристапот на кислород и да се спречи горењето на пластиката, хартијата и другите лесно запаливи отпадоци, истакна Спасов.

Попладнево огнот е ставен под контрола и не се дозволува негово проширување надвор од кругот на депонијата, со оглед што во непосредна близина има поголеми површини со сува трева и нискостеблеста шума. За целосно обезбедување и спречување на повторното избувнување на пожарот интервенираат и надлежните од Општината и од комуналното претпријатие “Солидарност“.

Ова не е првпат депонијата кај Лески да гори и од неа да се шири густ чад, но со својата местоположба и присуството на запалливи материи таа е потенцијална опасност за поголеми пожари во околината, а уште повеќе за загадувањето на животната средина.