Градежни работи на новата обиколница во Штип, сообраќајот затворен до 17 часот

Завршува втората фаза од изградбата на обиколницата во Штип. Денеска се изведуваат градежни работи на кружниот тек и улицата до фабриката „Баргала“. За побрзо и полесно поставување на вториот слој на асфалтот за сообраќај е затворен влезот и излезот на градот Штип, по бул. „Гоце Делчев“ кај поранешна Алумина.

Трајче Стојчевски од Кабинетот на градоначалникот на Општина Штип, за МИА вели дека овој влез и излез на Штип денеска ќе биде затворен до 17 часот, со цел градежната фирма што го гради кружниот тек и улицата до фабриката за чевли „Баргала“ побрзо и полесно го постави вториот слој на асфлат. Тој забележува дека со денешниве градежни активности завршува и втората фаза на обиколницата.

-Информирани се сите институции во градот, секако и Итната медицинска помош и Клиничката болница-Штип дека влезот и излезот на градот е затворен за сообраќај. Граѓаните и институциите до 17 часот ќе користат други алтернативен влез и излез на градот, вели Стојчевски.

Втората фаза од оваа обиколница чини 10.500.000 денари, а ќе овозможи и поврзување на индустриските зони со населбите „Автокоманда“, „ 8 Ноември“, „Баби“, „Дузлак“ и „Сењак“. Новиот кружен тек, ќе го забави сообраќајот за поголема безбедноста на учениците, студентите и работниците во околните фабрики. Но, се уште комплетно не е завршена првата фаза од обиколница, што почнува од стариот диспанзер и се протега до „Баргала“.

Фирмата „Актива“, која треба да го постави новиот мост на реката Брегалница се уште работи на изработка на железниот мост, а на улицата треба да се постави и уште еден слој асфалт.

Првата и втората фаза од оваа обиколница чини околу еден милион евра, средства обезбедени од општинскиот буџет.