Интензивно се уредува коритото на река Сушица во Радовиш

Интензивно продолжува да се работи на изградба на речното корито на река Сушица во Радовиш во рамки на проектот „Заеднички мерки за спречување и намалување на последиците од катастрофи во општините Сандански, Бугарија и Радовиш“, информира градоначалникот Герасим Конзулов.

-Коритото на реката Сушица’ во Радовиш треба да биде регулирано и уредено во иднина за да се спречи нејзино излевање при обилни врнежи од дожд. Ќе се регулира критичниот дел на реката, кој во изминатиот период честопати предизвикуваше поплави и огромни штети на инфраструктурата и правните лица во овој дел на градот, рече градоначалникот Конзулов.

Со уредувањето ќе се исчисти речното корито, ќе се подигнат каскади и ѕидови, а кејот покрај реката ќе биде озеленет.

Заедно со коритото на реката Сушица, кое се уредува во должина од 2,2 километри, во Радовиш ќе се уредат и други речни корита и суводилици со вкупна должина од 10 километри.