ЈКП Тетово ќе земе кредит за да ги плати придонесите на нивните вработени кои неодамна протестираа

Јавното комунално претпријатие „Тетово“ со кредит од банка ќе се обиде да ги плати придонесите на вработените и да ги подмири тековните потреби за работа.

Тие на денешната 34-тата седница на Советот на општината добија согласност за позајмување на 26 милиони денари.

Директорот на ЈКП Тетово Џелал Цека во образложението потенцираше дека помошта е повеќе од итна бидејќи вработените веќе протестираа поради неплатените придонеси за здравствено и пензиско осигурување.

-Поради пандемијата граѓаните не ги плаќаа комуналните сметки и ние трпиме загуба. Од друга страна моите вработени во периодот од март до септември собираа отпад и правеа дезинфекција на градот и беа на удар на коронавирусот, а сега немаат основна можност за здравствено осигурување. Ние сме во можност да плаќаме по 300 до 500 илјади денари месечно. Во 2019 сме позитивни во билансот и сметаме дека ќе добиеме кредит, истакна Џелал Цека.

Тој потенцираше дека за придонеси се потребни 15 милиони денари, а остатокот е подмирување на трошоците за нафтени деривати, електрична енергија и плаќање на регионалната депонија Дрисла каде се одлага собраниот смет од Тетово.

-Потребни се 26 милиони со оглед дека никој не може со сигурност да каже дали ќе се зголеми наплатата во октомври и каква ќе биде состојбата со короната во ноември, декември и понатаму. Воедно ние за неплатените сметки заради состојбата и уредбите на Владата не смееме да вршиме присилна наплата, рече Цека.

Советот на општина Тетово изгласа и одобрение ЈКП Тетово да ги продаде печките на дрва кои граѓаните ги оставаа за да добијат субвенции за добивање на инвертер-клима уреди. На тој начин комуналното претпријатие исто така да добие одреден износ за подобрување на финансиската состојба