„Се одлага“ и сценариото на Сашо Тасевски до пристигнување на првите вакцини

Идеално сценарио напиша на својот фејсбук профил актерот Сашо Тасевски во однос на најавеното пристигнување на првите вакцини во Македонија против Ковид-19. Сепак, истото ќе мора да се одложи откако примопредавањето на првите 8.000 дози вакцини на Фајзер од Србија се одложи за наредните денови.

- Имаме план за вакцинација.

Имаме сајт за вакцинација.

Имаме желба за вакцинација.

Имаме фрижидер за вакцини.

Имаме пунктови за вакцинација.

Се сними документарен филм со наслов: Кога вакцините стигнаа, сите стивнаа.

Се сними и игран филм: Вакцинирај ме нежно.

Се отвори и градинка со име: Вакцинирани пчелки.

Направен е ремикс на две песни од Тоше: Вакцини без граници и Вакцина во твоите руси коси.

Сменета е химната во: Денес во Северна се вакцинира….

Булеварот Партизански одреди од вчера се преименува во Булевар на вакцинираните херои.

Стадионот е преименуван во Арена Ревакцина Втора.

Споменикот на плоштадот е преименуван во Вакцинираниот воин на коњ.

Се планира вакцинација и на коњот.

Се бараат пратеници да гласаат за промена на уставот за пак да се смени името на државата во Вакцинирана Севернокинеска Астразанека Република Фајзер Македонија

Во државава некако се е во духот на победата над короната. Се слави вакцинацијата, а вакцини уствари, уште нема, гласи сценариото на Сашо Тасевски.