Во Кичево отворен локален центар за е-поддршка

Во присуство на претставници на локалната самоуправа Кичево, подрачните единици на Министерството за земјоделство шумарство и водостопанство, Агенцијата за поттикнување на развојот во земјоделството, Управата за јавни приходи, како и од останатите локални инстуции што делуваат на територија на општина Кичево, денеска беше отворен новиот центар за подршка за добивање на е-услуги, а воедно беше одржана и првата презентација за нивото на дигиталната писменост на локално ниво.

Извршната директорка на Рурална коалиција, Лилјана Јоноски, истакна дека овој центар ќе има голем придонес за сите граѓани , вклучувајќи го и земјоделското население.

-Главната цел за отворање на овој центар беше да се зголеми подршката и да ја подобриме електронската писменост на локалното население. Добро се сеќаваме на големите гужви пред банкарските шалтери, а сето тоа можеше да се направи многу поедноставно и без турканици, рече директорта Јоноски.

Нагласи дека Кичево покрај Скопје и Прилеп, ќе биде еден од трите градови, каде што се отвора ваков центар, но тој ќе им стои на располагање на жителите од целиот регион.

Таа во продолжение појасни дека вакви центри на локално ниво ќе се отвораат во сите земји од Западен Балкан и дека се работи за регионален проект. Иако центарот за овој регион е во Кичево, ќе бидат обучени и пет локални координатори кои ќе функционираат и во другите општини и градови, каде ќе се организираат отворени денови.

Директорката на крај подвлече дека овој проект ќе се одвива до 2023 година.