Граѓански протест пред фабриката „Пејпр мил“ во Кочани

Со двочасовен протест и блокирање на влезот на компанијата „Пејпр мил“, граѓани на Кочани доцна попладнево го искажаа незадоволството од загадувањето на воздухот од фабричкиот оџак.

Истакнаа дека нема промени во состојбата што трае со години, поради што протестите ќе продолжат секојдневно од 16 до 18 часот, за да ги алармираат надлежните да преземат мерки за заштита на животната средина.

-НАШАТА АГОНИЈА ТРАЕ НАД ДВЕ И ПОЛ ГОДИНИ, ТОЛКАВ ПЕРИОД СЕ ВРТИМЕ ВО КРУГ. ИМАМЕ ВПЕЧАТОК ДЕКА НАДЛЕЖНИТЕ ИНСТИТУЦИИ ВО ДРЖАВАТА НАМЕСТО ДА НÈ ШТИТАТ, ПОСТОЈАТ САМО ЗА ДА НÈ КАЗНУВААТ НАС ГРАЃАНИТЕ. ГИ ПОМИНАВМЕ СИТЕ ИНСТАНЦИ, ПРЕКУ ПОЛИЦИЈА, ОБВИНИТЕЛСТВО, МИНИСТЕРСТВО ЗА ЖИВОТНА СРЕДИНА, ДРЖАВЕН ИНСПЕКТОРАТ, НЕМА КАДЕ НЕ СЕ ОБРАТИВМЕ И СЕ МОЛИМЕ КАКО МАЛИ ДЕЦА. СИТЕ ЈА ПРЕФРЛУВААТ ОДГОВОРНОСТА, А РЕШЕНИЕ НЕМА. ЗНАЕМЕ ДЕКА ИНСПЕКТОРИТЕ ДОАЃААТ НА ДОГОВОРЕНИ МЕРЕЊА НА ЧАДОТ ОД ОЏАКОТ. ОВА НЕ Е НАША ЗАДАЧА, НЕ ТРЕБА ГРАЃАНИТЕ ДА СЕ ЗАНИМАВААТ СО ВАКВИ ПРОБЛЕМИ, ТУКУ ИНСТИТУЦИИТЕ, ЗАТОА ШТО ТУКА ДИРЕКТНО СЕ РАБОТИ ЗА ЗДРАВЈЕТО НА 40 ИЛЈАДИ ЛУЃЕ, ИСТАКНА ВЛАТКО ЗДРАВКОВ, УЧЕСНИК НА ПРОТЕСТОТ.

Граѓаните рекоа дека не ги обвинуваат сопствениците на „Пејпр мил“, кои дошле за да остваруваат профит, туку им забележуваат на државните органи за, како што велат, рамнодушноста кон проблемот.

-ВО ГРАДОТ ИМА СОЗРЕАНА АТМОСФЕРА ЗА ЕКСТРЕМНИ ГРАЃАНСКИ АКТИВНОСТИ ВО ВРСКА СО ФАБРИКАТА, А ТОА ГО ЗНААТ И НАДЛЕЖНИТЕ. ТАКВО НЕШТО НЕМА ДА ГО ДОЗВОЛИМЕ, ЗАТОА ШТО НЕ САКАМЕ НИЕ ОД КЛАСИЧНИ ЖРТВИ ДА СТАНЕМЕ НАСИЛНИЦИ, А ВИСТИНСКИТЕ НАСИЛНИЦИ ДА НЕМААТ ОДГОВОРНОСТ. ЖИВОТОТ СО СЕКОЈДНЕВНО ЗАГАДЕН ВОЗДУХ Е НЕИЗДРЖЛИВ, И ЗА ПОСТАРИТЕ, НО УШТЕ ПОВЕЌЕ ЗА ДЕЦАТА И МЛАДИТЕ, ИСТАКНА СИМЕОН ДАНЕВ, УЧЕСНИК НА ПРОТЕСТОТ.

Учесниците на протестот нагласија дека поради нефункционирањето на институциите во државата, планираат да преминат на собирање потписи, со матичен број од две третини од населението, за да побараат помош од странски амбасади или од Судот за човекови права во Стразбур.