До избор на нов лидер потпретседателот Енкелејд Алибеај на чело на албанските демократи

По оставката на Љуљзим Баша, од функцијата претседател, до избор на нов, на чело на најголемата албанската опозициска партија, Демократската партија, ќе биде Енкелејд Алибеај, кој е еден од партиските потпретседатели.

Во неговата прва изјава како вршител на должноста претседател на партијата, тој пред партиското седиште кажа дека „единството е клучот на вредностите“ оти „денеска повеќе од кога било, има потреба од обединување“.

-Денеска верувам дека се потсетуваат сите оние кои пред 30 години гласаа обединети, избирајќи ја слободата, избирајќи ја демократијата и верувам дека единството во вредностите е клучот за сите оние кои денес страдаат како некогаш, всушност, како пред 30 години, друго решение нема. Единство кон овие вредности, почит еден кон друг, единство и кон она што е најголемото зло, режимот кој е веќе инсталиран во Албанија и кој се чувствува секој ден, од утро до вечер во животот на секое албанско семејство. И верувам дека ова е повик што доаѓа од душата и срцето не само на секој демократ, туку и на секој Албанец, рече Алибеај.

Додаде дека неопходно е единство меѓу демократите, што, верува тој дека ќе го постигнат заедно.

-Да се здружиме токму за доброто на Демократската партија, порача тој.

Четириесет и девет годишниот Алибеај, е актуелен пратеник, а министер за правда беше за време на демократската влада на Сали Бериша во периодот 2007/2009 година.

Според статутот по одлуката, која треба да ја донесе Националниот совет на партијата, нов лидер како и претходно ќе се избира според начелото „еден член, еден глас“, како што беше избран и Баша, кој на лидерската функција беше девет години.