Косовската Влада додели 100 илјади евра помош за Украина

Косовската Влада го усвои предлогот на Министертвото за надворешни работи за доделување на првиот контигент помош за Украина, во висина од 100 илјади евра, јави дописникот на МИА од Приштина.

Како што информира шефицата на косовската диломатија, Доника Грвала, средствата ќе бидат доделени на хуманитарната оргнизација „Мајка Тереза“, која ќе се нафати со организирање на помошта, односно со купување на производи по потекло од Косово, кои подоцна ќе бидат префрлени во Украина со патен транспорт.

– Република Косово преку оваа симболична помош ја изразува својата солидарност и поддршка на народот на Украина, изјави Грвала.

Владата на Албин Курти на денешната седница донесе одлука и за засолнување на 20 украински новинари и нивните семејства, како и за воведување нов, четврти по ред, пакет економско-финансиски санкции против Русија и Белорусија поради агресијата врз Украина.