Анкета: Повеќе од 80 отсто од студентите во Белград сметаат дека на факултетот има корупција

Вкупно 85,8 отсто од анкетираните студенти на белградскиот универзитет сметаат дека постои корупција на факултетите, 12,8 отсто се изјасниле дека корупцијата е исклучително изразена, а 14,2 отсто дека нема корупција, покажуваат резултатите од истражувањето на Агенцијата за спречување корупција.

Во анонимна онлајн анкета за состојбата со корупцијата на Универзитетот во Белград, спроведена во октомври 2021 година, учествуваа 1.052 студенти од сите години на студирање на шест факултети (Правен, Филозофски, Факултет за политички науки, Медицина, Факултет за организациски науки и Факултет по математика).

Речиси половина од анкетираните студенти сметаат дека на факултетот каде што студираат нема корупција или е присутна во помала мера. Само околу три отсто од учесниците во истражувањето изјавиле дека на Универзитетот во Белград воопшто нема корупција, додека 63 отсто сметаат дека корупцијата е широко распространета, додека 20 отсто од испитаниците се изјасниле дека е исклучително изразена.

На прашањето дали некој предложил да посредуваат при поткуп за испити, дипломи или други поволности поврзани со студирањето, околу 80 отсто од студентите одговориле дека немаат такво искуство, додека нешто повеќе од 14 отсто од испитаниците дале потврден одговор, јави Бета.

Од вкупниот број испитаници, 69 одговориле дека за време на студирањето, еден од вработените на факултетот (наставен или ненаставен кадар) побарал поткуп.

На прашањето каков поткуп се бара од нив, 75 отсто се изјасниле дека им барале пари, нешто повеќе од 13 отсто дека им бил побаран подарок, а речиси 12 отсто дека им била побарана услуга.