За долг од 1 денар кон БЕГ, извршители му наплаќаат 12.439 денари (Фото)

За долг од 1 денар кон „Балкан енерџи груп“ (БЕГ), пензионерот Крсте Серафимов од Скопје треба да плати 12.439 денари. Од компанијата го дале Серафимов на извршител за заостанат долг од минататото. Извршителката Моника Муча од Скопје го активирала налогот за наплата, преку кој му е определена забрана за една третина од пензијата и активиран налогот за исплата на 12.439 денари.

Извршителите убедуваат дека постојат за доброто на граѓаните, но тоа добро граѓаните никако да го почувствуваат. Тогаш кога ќе дојде на нивна кожа – воопшто не е добро.

Досега имало многу обиди да се воведе ред во извршителската дејност, но извршителите се ставаат над законот и немилосрдно ја спориведуваат својата агенда, пренесува Република.

Извршителите не одмараат ниту за празниците, се блокирале сметки и пред Божик, па не е чудно што на овој човек сметката за наплата му дошла пред Велигден.

Причина за зголемување на блокираните сметки велат од здружението „Стоп за извршители“ е во тоа што се очекува новиот закон за извршување со кој меѓу другото предвидено е да се корегира и тарифата за награда и надоместок на извршителите, па затоа сега извршителиоте брзале со наплатата.

– Тие продолжуваат и понатаму со блокада на граѓаните, без разлика дали е петок попладне, дали е празник. Премиерот најави нов Закон, дали тоа ги плаши, дека доаѓа крајот на овој грабеж и сега што може „да се улови во матно“, вели Марјан Ристески – Стоп за извршители.

Во меѓувреме, од канцелариајта на народниот правобранител велат дека претставките до нив се зголемуваат, а извршителите често знаат да го злоупотребат законот за извршување, па дури да остават и деца без основни приходи. Загрижувачки според нив, е што дел од извршителите не ги слушаат препораките од народниот правобранител.