Штип инвестираше над седум милиони денари во училиштата

Општина Штип во изминатите месеци инвестираше околу 7.200.000 денари во училиштата. Средствата се искористени за решавање на приоритетните проблеми со цел учениците и наставниците да имаат подобри услови за настава. Градоначалникот на Општина Штип, Благој Бочварски денеска го посети Општинското основно училиште ООУ „Димитар Влахов“, каде што се инвестирани два милиони денари.

– Информиран сум од директорот дека јавните набавки се завршени и се во фаза на реализација. Имаме нов котел за парното греење што беше во дотраена состојба, со тоа што греењето го решивме за еден подолг временски период, опремување неколку кабинети со сите потребни материјали со тоа што можеме да кажеме дека вршиме подобрување на условите за учење, вели Бочварски.

Тој денеска, заедно со раководителот на Секторот за јавни дејности Билјана Казанџиска, го посети и училиштето „Славејко Арсов“ во населбата Баби, каде што со 2.200.000 денари локалната власт го реши проблемот со топлиот премин од училиштето до новата спортска сала, се со цел учениците во текот на зимскиот период растојанието од околу 70 метри го поминуваат безбедно.