Обуки за вински ентузијасти на светски реномираната Лондонска школа за вино и жестоки пијалаци

Винарската визба „Тиквеш“ доби акредитација за организирање обуки на престижната Лондонска школа за вино и жестоки пијалаци – Wine & Spirits Education Trust (WSET), најголемиот светски провајдер на обуки во доменот на виното и жестоките пијалаци. Учесниците на обуките, преку проверка на стекнатите знаења, ќе можат да се стекнат со меѓународно признаени сертификати за познавања од областа, информираат од ImagePR.

Школата „Вински едукатор“ почнува со работа, а обуките, според највисоките стандарди на едукација во областа, ќе ги изведуваат реномирани искусни предавачи сертифицирани од оваа светски признаена едукаторска организација.

– Програмите и највисоките стандарди на Лондонската школа и нејзините интернационални обучувачи ќе отворат нови можности за развој на македонскиот пазар на вино, но и за раст на домашната винска индустрија, преку создавање нови познавачи на виното, едуцирани трговци со вино и персонал по рестораните и вински ентузијасти. Тие понатаму ќе ја шират винската култура и бенефитите од умерената и одговорна конзумација на виното, изјави генералниот директор на „Тиквеш“ Радош Вукиќевиќ.

Лондонската школа за вино и жестоки пијалаци има едукативни програми во повеќе од 75 земји во светот. Во Македонија, на самиот почеток ќе бидат организирани обуките од прво и второ ниво, кои не бараат претходно познавање од областа, а во натамошниот период ќе бидат достапни обуки од напредните програмски целини.

Рокот за апликации е во тек и трае до почетокот на март, а првите обуки ќе се одржат од 27. до 30. март оваа година во М6 Едукативниот центар во Скопје, се наведува во соопштението од ImagePR.