Центарот за култура во Кочани доби нов покрив

Центарот за култура „Бели мугри“ во Кочани доби нова покривна конструкција на површина од над 300 квадратни метри, на западната страна од објектот. Замената на покривот е дел од првата фаза за надворешна реконструкција за што од Министерството за култура се обезбедени 14,5 милиони денари, со кои досега е поставена нова термофасада, а старите дрвени прозорци и врати се заменети со алуминиумски профили.

– Преостанува да се направи финалната обработка на фасадата откако заврши уредувањето на влезниот портал и поплочувањето на платформата од предната страна. Задржана е автентичноста на влезните столбови со црните мозаик-плочки, а на другите тераси се заменија подните плочки. Со реконструкцијата на фасадата и кровот на објектот „Бели мугри“ се отвори и прашањето за потребите и можностите на дел од просторот, посебно за терасата од источната страна, која со застаклување би се користела и како затворен простор – истакна Марјанчо Јованов од Одделението за урбанизам во Општина Кочани.