Пензионерите од Делчево се подготвуваат за Регионалните спортски игри

Со активни тренинзи двапати во неделата, делчевските пензионери интензивно се подготвуваат за Регионалните пензионерски игри, кои на почетокот на идниот месец ќе се одржат во Берово.

Пензионерот Киро Даневски е еден од најредовните учесници на игрите, а најсилна дисциплина му е тегнењето јаже, дисциплина од која и годинава очекува позитивен резултат.

-Активни сме, двапати во неделата доаѓаме овде во паркот каде се одвиваат тренинзите. Се надеваме дека и годинава добро ќе се претставиме. Покрај тегнење јаже, имаме екипи и во стрелање, трчање, фрлање ѓуле и други дисциплини, во кои сме меѓу најдобрите во регионот, вели Даневски. Освен за спорт, слободното време како што додава Даневски, пензионерите го користат и за други активности во новите простории на здружението.

-Многу сме задоволни од условите бидејки е реновирана зградата, просторијата е нова и секој ден се собираме тука. Најчесто играме шах, пинг понг, билјард, карти и го користиме времето и за заедничка дружба, додава Даневски.

Делчевското здружение брои околу 3.200 пензионери, од кои околу стотина, се уште активно учествуваат во сите спортски активности кои ги организира здружението.