Младите во Виница учеа за спречување на врсничкото насилство

Во рамки на проектот „Да ги земеме правата во наши раце“ во Виница се одржа дебата против булингот, односно меѓуврсничкото насилство кај младите, а на која учествуваа претставници од стручните служби од училиштата, од локалната самоуправа, родители и ученици.

Проектот се реализира во соработка со првата детска амбасада во светот „Меѓаши“, финансиски е поддржан од хуманитарната организација „Safe the children – International“, а во него се вклучени ученици од основното училиште „Славчо Стојменски“ од Виница.

– Целта е да се подигне свеста кај младите за различните форми на насилство и превенцијата од истото, односно да ги поттикнеме да размислуваат за тоа како да го спречат и да се заштитат од меѓуврсничкото насилство. Сакаме заеднички со родителите и наставниот кадар да ги детектираме најчестите облици на вербално и физичко насилство меѓу учениците и да посочиме практични примери за преземање соодветни мерки, како во семејствата, така и од страна на стручниот кадар во училиштата, истакна Јана Зенговска од детската амбасада „Меѓаши“.

На дебатата нагласија дека во последните години актуелно е психолошкото насилство меѓу младите, што неретко завршува со физички пресметки. Сè почесто се регистрира интернет насилство како посебна форма, за кое родителите, наставниците и стурчните служби се соочуваат со проблем како да го препознаат и да го спречат. Притоа, насилството е подеднакво застапено меѓу двата пола, а има и инциденти на етничка основа.

Дебатата за меѓуврсничкото насилство е втора активност во Виница во рамки на проектот, откако минатата година по повод Меѓународниот ден за превенција од насилство, учениците од ОУ „Славчо Стојменски“ организираа форум театар на истата тема.