Доделена наградата за идејното решение за ,,Паркот на млади“ во Македонска Каменица

Јавното претпријатие „Камена Река” и Општина Македонска Каменица ги доделија наградите за учесниците на наградниот конкурс за идејно решение според кое ќе се уредува „Паркот на млади” во Македонска Каменица.

Победници на наградниот конкурс се Денис Садулов и Христина Стојилова, чие идејно решение доби најмногу гласови на спроведената фејсбук анкета. Нивниот проект, како што информираше директорот на претпријатието, Влатко Андоновски, беше избран за најдобар и од комисијата која ги разгледуваше сите проекти поединечно.

– ПРЕДЛОЗИТЕ ЗА УРЕДУВАЊЕ НА ПАРКОТ ГИ ОЦЕНУВАШЕ ЖИРИ КОМИСИЈА ФОРМИРАНА ОД СТРАНА НА ЈП „КАМЕНА РЕКА” СОСТАВЕНА ОД ПЕТ ЧЛЕНА (ПРЕТСТАВНИЦИ НА ЈП КАМЕНА РЕКА И ПРЕТСТАВНИЦИ НА ОПШТИНА МАКЕДОНСКА КАМЕНИЦА) И ДОПОЛНИТЕЛНО БЕШЕ СПРОВЕДЕНА ЈАВНА И ТРАНСПАРЕНТНА ФЕЈСБУК АНКЕТА, КАДЕ ШТО СИТЕ КОРИСНИЦИ НА ОВАА ПОПУЛАРНА СОЦИЈАЛНА МРЕЖА, ИМАА МОЖНОСТ ДА ГО ИСКАЖАТ СВОЕТО МИСЛЕЊЕ И ДА ЈА ДАДАТ СВОЈАТА ПОДДРШКА ЗА ЕДНО ОД ИДЕЈНИТЕ РЕШЕНИЈА, РЕЧЕ АНДОНОВСКИ.

Додаде дека покрај вредносните ваучери за првонаградените, ЈП „Камена река” обезбеди симболични награди и благодарници за сите пријавени учесници на конкурсот.

Благодарниците на наградените учесници им ги додели градоначалничката на општината, Соња Стаменкова која рече дека општината и во иднина ќе биде отворена за секоја добра идеја на младите ентузијасти од Македонска Каменица.

-МАКЕДОНСКА КАМЕНИЦА Е ОТВОРЕНА ЗА СОРАБОТКА И ВО ИДНИНА. ЕНТУЗИЈАЗМОТ И ЕНРГИЧНОСТА НА МЛАДИТЕ Е НЕШТО НА КОЕ МАКЕДОНСКА КАМЕНИЦА СЕ НАДЕВА И ОЧЕКУВА ВО ИДНИНА РЕАЛИЗАЦИЈА НА УШТЕ МНОГУ ВАКВИ И СЛИЧНИ ПРОЕКТИ, РЕЧЕ СТАМЕНКОВА.

Проектот ,,Парк за млади”, веќе е дел од Програмата за работа на општина Македонска Каменица и ЈП ,,Камена Река”, како иницијатор за изградба на ваков парк во градот. Неговата изградба ќе биде со забрзана динамика, со што на младите ќе им се обезбеди едно урбано катче. Моментално на овој дел од градот се уредува кејот на Каменичка Река, во должина од 125 метри.