Членови на ПК „Љуботен“ добија меѓународни лиценци за водичи во планина

Четворица членови на планинарскиот клуб „Љуботен“ од Тетово добија лиценца според стандардот на Меѓународната унија на интернационални водичи во планина (UIMLA). Лиценците им ги предаде претседателот на Унијата, Иан Спеар.

– Со имплементирање на овој стандард, Македонија влегува на светската мапа на дестинации каде што има добро обучени водичи кои можат да реализираат програма. Од една страна се безбедни, а од друга страна тоа се атрактивни програми кои ќе испорачаат високо ниво и гаранции за повисока цена и нормално ако гледаме од бизнис аспекти имаме посилен аспект за развој, бидејќи така ќе имаме желба кај посетители за подолг престој, сместување и добивање исхрана – истакна Константин Циривири, претседател на Македонската асоцијација на интернационални водичи во планина.

Инаку, претседателот на меѓународната унија, Спеар додели вкупно 20 лиценцирани сертификати.

– Нивото на организација тука во Македонија е фантастично. Нивото на работа на македонската асоцијација на водичи во планина е фантастично, беа високи оцените на извештаите кои произлегоа од посетите од инспекциите кои ги спроведоа стручните лица од техничката комисија на UIMLA и генерален заклучок е дека нивото на работа и нивото на обука и контролата на работењето на високо ниво и она што е најважно е големата пасија големиот ентузијазам кој постои за вршење дејности во оваа организација – рече Спеар.

Претседателот на ПК „Љуботен“, Јован Божиновски рече дека во регионот на Шар Планина имаме среќа што нивниот клуб ја препозна потребата за планинарски водичи.

– Пред 15 години заедно со Константин Циривири, кој ми беше пријател и соработник, се случија првите обуки кои почнаа да го практикуваат овој интернационален стандард за планинарски водич. Тоа беше добра основа за она што понатаму како планинарски клуб продолживме да работиме и овој стандард не те учи како да се движиш во планина туку те учи како да се развива туризмот во овие средини – потенцира Божиновски.