Општина Струмица воспостави соработка со украинската Општина Берегово

Градоначалникот на Струмица, Коста Јаневски со неговиот колега од украинската Општина Берегово, Золтан Бабијак, потпиша писмо со намери за воспоставување на соработка меѓу двете општини, соопштија денеска од општината.

– Тоа значи воспоставување на поголема економска соработка помеѓу претпријатијата од двете општини, создавање на услови за вмрежување и соработка помеѓу малите и средни претпријатија, промоција на инвестициските можности на општина Струмица и поволностите за инвестирање во Струмица, информираат од општинската прес-служба.

Во делегацијата од Општина Струмица се и претседателот на Советот, Марјан Даскаловски и раководителот на Одделението за меѓународна соработка и европски фондови, Ѓоко Ристовски.

Посетата се реализира на иницијатива на Амбасадата на Украина во Република Северна Македонија.

Инаку, Општина Берегово во Украина граничи со две европски држави: Унгарија и Романија.