Стаменковска: Се обидува ли Рашковски да сокрие случај со коронавирус на вработен во Генералниот секретаријат?

Дополнителната заменик министерка за информатичко и администрација, Невенка Стаменковска на својот фесјбук профил прашува дали е на повидок нов Ковид кластер во Генералниот секретаријат на Владата и обвинува дека Генералниот секретар Драги Рашковски се обидува да прикрие позитивен случај на вработена која неколку дена одела на работа а била позитивна на вирусот.

- Дали е на повидок кластер на зараза со Ковид-19 и во Генералниот секретаријат на Владата!?

Во обид да се прикаже ситуацијата како нормална кога имаме над 1.800 активни случаи на КОВИД-19, Владата во континуитет носи низа неодговорни и нелогични одлуки во кои македонската јавност може да ја препознае нивната алчност, непромисленост и саможивност. Раководните лица на институциите не само што не преземаат никакви мерки за заштита на здравјето на вработените, туку со нивните чекори дополнително ја влошуваат ситуацијата и од јавниот сектор создаваат жариште на зараза.

По пријава од вработени кои се сериозно загрижени за сопственото здравје и здравјето за нивните најблиски, добив известување дека вработена во Генерален секретаријат на Владата на Република Македонија на 8 јуни се тестирала и е потврдено дека е позитивна на Ковид-19, со што во голем ризик биле ставени вработените кои патувале со неа, но и околу 20 нејзини колеги кои се во иста канцеларија со вработената.

Дали овој случај Драги Рашковски се обидува да го сокрие и со тоа да ги загрози здравјето и животите на над 300 вработени во Генерален секретаријат на Владата на Република Македонија?

Дали воопшто постојат било какви протоколи и како оваа вработена со недели одела на работа без да извести за нејзината здравствена состојба?

Дали постојат и други вработени во Генерален секретаријат на Владата на Република Македонија кои се позитивни на Ковид-19 и дали е некој од вработените во самоизолација токму поради посочениов случај?

Негрижата и непочитување на Законот за безбедност и здравје при работа и протоколите е најизразено во институциите, но никој не поведува постапка и не бара одговорност од функционерите кои се должни и одговорни за доследна примена на законите и грижата за здравјето на вработените во јавниот сектор!

Поради тие причини, наместо да трошат ресурси во нелогични пропаганди и убедување на македонските граѓани дека петмина во избирачки одбор е сосема нормално, но тројца во ресторан претставува ширење на зараза, барам ВЕДНАШ:

1. да ги обезбедат сите средства потребни за целосна и соодветна примена на законите и протоколите

2. Да се преземат мерки за рана детекција и следење на КОВИД-19 во институциите

3. Да ги ослободат сите вработени кои патуваат од подрачјата каде има КОВИД-19

4. Неселективност и утврдување на одговорност за сите функционери кои не ги почитувале протоколите и го загрозиле здравјето на вработените во јавниот сектор!, вели Стаменковска.