Програма „Обнова за Македонија“: Ќе овозможиме поволни услови за водење бизнис

Добрите практики воспоставени од минатите влади во насока на подобрување на условите за водење бизнис и спроведените реформи поврзани со регулаторната гилотина ќе бидат продолжени, а сите детектирани слабости и адресирани пропусти во таа насока ќе бидат надминати возаедничка соработка со бизнис-заедницата.

Напорите и реформите во регулативата ќе бидат насочени кон подобрување на правниот систем со цел намалување на правните бариери, кои се однесуваат на непотребни закони, правила и процедури, кои го ограничуваат бизнисот и кои ги зголемуваат трошоците за водење бизнис.

Дополнително, предвидуваме укинување на голем број парафискални давачки кои го оптоваруваат бизнисот.

Во исто време, ќе ја зголемиме транспарентноста во постапките и ќе ги намалиме процедурите за добивање на разни лиценци/дозволи кои се издаваат од државни институции и ќе работиме на зајакнување на капацитетите на инспекциските служби со цел сузбивање на корупцијата и сивата економија.

МЕРКА 3. ЗГОЛЕМУВАЊЕ НА ТРАНСПАРЕНТНОСТА ВО БИЗНИС-ЗАЕДНИЦАТА ПРЕКУ ОТВОРЕНИ ДЕЛОВНИ ПОДАТОЦИ И ЕДНОСТАВЕН ПРИСТАП ДО ИСТИТЕ

Ќе ги отвориме информациите од Централниот регистар што се однесуваат на фирмите. По примерот на развиените европски земји и по барање на бизнис-заедницата, секој заинтересиран за водење бизнис ќе има бесплатен пристап до информациите за седиштето, сопствеништвото и органите на управување на фирмите, како и до информациите за нивното финансиско работење. Со ова ќе направиме револуција во бизнис-климата, значително зголемувајќи ја транспарентноста и сигурноста во правниот промет. Ќе воведеме модел на финансирање на Централниот регистар преку кој значително ќе се намалат парафискалните давачки за фирмите

– секоја фирма ќе плаќа помалку отколку што плаќа сега, без притоа да се загрози развојот на една од институциите што се стожер на македонскиот бизнис, истовремено поттикнувајќи го домаќинското работење и унапредувањето на услугите што се обезбедуваат таму. Истовремено, ќе се зголеми квалитетот на податоците со кои располага регистарот, што ќе ја зголеми ефикасноста и на другите институции.

ПРОЕКТ 1: СЛЕДЕЊЕ НА БИЗНИС-ПАРТНЕРИ

Во Централниот регистар ќе се воведе услуга за автоматско алармирање при промена на податоци кај селектирани бизнис-партнери. Со ова ќе се олесни работата на фирмите и ќе се зголеми правната сигурност. Фирмите на овој начин автоматски ќе добиваат информација дали некој нивен соработник отворил стечај, променил адреса на седиште, ставил нешто под залог или променил управител.

Рок: септември 2020 година.

ПРОЕКТ 2: ДОСТАВА НА ДОКУМЕНТИ НА АДРЕСА

Заради олеснување на работата на фирмите, на нотарите и адвокатите, во случаите кога им се неопходни хартиени документи, Централниот регистар ќе понуди достава до канцелариите на нарачателите. Со тоа ќе се минимизира потребата од трошење време и средства за физичко присуство во канцелариите на Централниот регистар.

Рок: септември 2020 година.

ПРОЕКТ 3: ВОВЕДУВАЊЕ НА РЕГИСТАР НА ЛИЦЕНЦИ И ДОЗВОЛИ НА ПРАВНИ И ФИЗИЧКИ ЛИЦА

Во овој регистар би се соединиле информациите за сите лиценци и дозволи со кои располагаат правните и физичките лица во Македонија. Институциите во разни постапки ќе ги преземаат овие информации од овој регистар по службена должност, наместо да ги бараат од странките во постапката, со што ќе се подигне и сигурноста во правниот промет. Исто така, фирмите и граѓаните во секој момент ќе имаат информација, кое физичко или правно лице со каква лиценца располага и полесно ќе можат да најдат бизнис-партнер или соработник.

Рок: септември 2020 година.

ПРОЕКТ 4: ПРЕЗЕМАЊЕ НА ПОДАТОЦИ ОД ЦЕНТРАЛНИОТ РЕГИСТАР НА НАСЕЛЕНИЕ

Трговскиот регистар целосно ќе се интегрира со Централниот регистар на население, што значи дека фирмите веќе нема да мора да пријавуваат промени на личните податоци за физичките лица – сопственици или овластени лица за застапување. Со ова ќе се намали бирократијата, односно ќе се намалат обврските за известување, времето и трошоците за фирмите.

Рок: септември 2020 година.

*ППР