Николоски: Заев глуми „локал патриот“ а во неговото Муртино 18 години нема канализација и од фекалии се шири ужасна миризба

Човек кој што 18 години бил на власт, локална и централна, и кој од уста не го вади и кој што е горд со своето родно село Муртино и не направил ништо за да го среди не може да ни ја оправа државата.

Ова го истакна денеска потпретседателот на ВМРО-ДПМНЕ, Александар Николоски, кој е и носител на Изборна единица 4 на средба со граѓаните на Валандово.

Тој потенцираше дека од почетокот на кампањата ги посети сите населени места во четвртата Изборна единица и рече дека е запрепастен од сликата што ја видел во село Муртино.

Николоски истакна дека во Муртино сеуште нема канализација и дека фекалиите, летниот период, се излеваат во два големи канали, од кои што се шири ужасна миризба и кои го загрозуваат здравјето на локалното население.

– Овој големиот локал патриот од уста не го вади тоа негово Муртино. Не знам дали сте биле во Муртино, но јас бев и ќе ви кажам како изгледа. Има една улица како оваа тука, од лева страна од улицита е ископан канал огромен, од десна страна ископан уште еден канал. Канализацијата тече во отворени канали. Секое лето луѓето се заболуваат од фекалиите кои што течат по тие канали, а секој поголем дожд се поплавуваат. И си велам, па овој дома не си средил во 18 години, една канализација не направил по една цевка да стави и лево и десно, но ако не ништо друго да не му мириса и да не се разболуваат родителите негови кога ќе отидат таму, ние чекаме ќе ја оправал државата, рече Николоски. Е со таков „локал патриот“ си имаме работа, додаде Николоски и порача дека затоа, овие избори мора да го победат.

Тој констатираше дека човек кој што е недомаќин дома, ќе е недомаќин, и како што се покажа дека е и за цела држава, затоа на 15 јули сите масовно да излеземе и да го поразиме.