Нови одржливи решенија за битолската населба Баир

Регионалното географско друштво „Геосфера“ од Битола, во рамки на проектот „А бе, го сакам Баиро чист“ предлага одржливи решенија за надминување на проблемите со дивите депонии, спалувањето кабли и загадувањето на воздухот, како и проблемите со водоснабдувањето и хигиената на населението во услови на пандемија.

Според теренски истражувања во населбата Горен Баир, извршени од Геосфера-Битола, потребни се трајни решенија, кои целосно ќе ги решат проблемите, а не нивно краткорочно решавање.

Регионалното географско друштво „Геосфера“ од Битола и партнерски невладини организации, реализатори на проектот, во своите заклучоци посочуваат на поголема соработка меѓу граѓанските здруженија во Битола за интензивирање на притисокот врз институциите и јавноста во градот за трајно решавање на еколошките и комуналните проблеми во населбата Баир, поголем ангажман на граѓанскиот сектор и институциите во зголемувањето на еколошката свест кај ромското население, промена на урбанистичките планови и урбанизирање на населбата Горен Баир, со што ќе се овозможат инвестиции во водоводната и канализационата мрежа и трајно ќе се решат проблемите со водоснабдувањето, или дислоцирање на населбата на соодветен простор, како и поголема присутност на инспекторатот за животна средина на терен во населбата и санкционирање на палењето на кабли.

Во соопштение до јавноста од регионалното географско друштво „Геосфера“ нагласуваат дека за поголем дел од населението во битолската населба Баир не е можна примена на механизмот за бесплатна правна помош во случај на нарушување на правото за здрава животна средина и чиста вода, бидејќи дел од населението е нелегално населено во таа населба.