Промоција на филмот „Малечка“ на Ана Андонова

Краткиот игран филм „Малечка“ во режија на Ана Андонова вечер ќе има премиера во Тетово на отворено во дворот на Музејот на Комунистичката партија на Македонија. Филмот е снимен минатата година и требаше премиерно да се прикаже пролетва но поради коронавирусот премиерата се прави сега.

-Поради ситуацијата премиерата е на отворено и ќе има две проекции од 19.30 и од 20.30 и ќе има и трета се со цел да не бидат многу луѓе блиску на едно место. Влезниците се бесплатни но и задолжителни да има доволно растојание меѓу сите. Ќе има мерење на температура, дезинфекција и задолжително носење на маски, најави младата режисерка.

Филмот трае 24 минути и е во категоријата кратки играни филмови.

–Во филмот учествуваат 6 актери и над 50 статисти. Главните улоги ги имаат Мартина Стерјоска, Марко Богданоски, десет годишната Меланија Серафимовска и девет годишната Мила Ефкоска. Филмот е сниман на повеќе локации во село Туденце, а се зборува за една свадба и еден несакан брак, за помалечката сестра на невестата која најмногу се противи на тој брак и за нејзината пријателка, мало девојче од селото кое никој не го сака, вели Ана.

Филмот „Малечка “учествуваше на Младински филмски фестивал во Скопје.