Од ковид почина Николче Дамчевски, гинекологот кој на пациентка и водел лажна бременост

Николче Дамчевски, докторот гинеколог кој во јавноста стана „популарен“ кога доби затворска казна поради тоа што лажел пациентка дека е бремена, а кој потоа избега во Бугарија за да не оди во затвор, починал од компликации од Ковид-19 во Софијa.

Тој беше осуден на две години затвор, а Лекарската комора му ја одзема лиценцата на седум години.

Дамчевски во период од месец септември 2015 до април 2016 година презентирал состојба на лажна бременост на пациентка врз која претходно спровел биолошки потпомогнато оплодување. Иако знаел дека оштетената не е бремена, ѝ правел редовни контролни гинеколошки прегледи со ехо апарат, презентирал лажни ехо снимки на кои се гледа плод, презентирал лажна срцева акција на плодот, мерел должина и тежина на плодот, го утврдил полот на плодот, вербално на секој преглед детално ја објаснувал секоја наводна снимка од плодот, правел и скрининзи со писмени извештаи во кои е наведено дека на ехото се гледа плод во различна гестациска недела, а потоа договорил и термин за пораѓање.