Во тек активности за разубавување на дворната површина во Домот за стари лица во Берово

Во Берово во тек се активности за разубавување на дворната површина во Домот за стари лица ,,Д-р Иван Влашки”. За уредување на дворните површини, од буџетот на установата ќе бидат потрошени околу 300 илјади денари.

-Целта на разубавување на дворната површина во ОЈУСЗСЛ ,,Др. Иван Влашки” во Берово е старите лица, да добијат уште по пријатно катче за престој. Во таа насока во тек се активности за изградба на уникатна украсна црквичка, бунар и летниковец, кои на дворот му даваат дополнителна убавина, а за станарите обезбедуваат нови содржини, информираа од установата.

Паралелно, како што додадоа во тек е уредувањето на ентериерот на Третата ламела во установата.

-Во нашата установа, во тек е внатрешно уредување на третата ламела, која ќе донесе 10 легла за нови корисници и хортикултурно уредување, со што домот прераснува во една реномирана установа, која ги исполнува сите услови и стандарди за пријатен престој на оние кои цел живот се грижеле за нас, додадоа од ОЈУСЗСЛ ,,Д-р Иван Влашки”.

Дополнија дека со континуирана поддршка од Министерството од труд и социјална политика, домот за стари лица во Берово, секојдневно ги проширува своите капацитети, подновен и разубавен, со нови реквизити, кои го надополнуваат амбиентот.