Растат платите во Софија по пад од почетокот на пандемијата

Платите во Софија продолжуваат да растат по благ пад на почетокот на пандемијата во март и април 2020 година. Просечната плата во Софија за септември 2020 година е 1.868 лева, што е за 102 лева повеќе од февруари 2020 година, последниот месец пред воведувањето на вонредната состојба, покажуваат податоците на Националниот завод за статистика.

За една година просечната плата во Софија е зголемена за 157 лева (+ 9,2 отсто), јави дописникот на МИА од Софија.

Во сите области на земјата, просечните плати се опоравија по падот во март и април 2020 година и се повисоки од нивото пред кризата. Просечното зголемување на платите во споредба со февруари е 6,8 отсто, а во различни области зголемувањето е најчесто за 80-90 лева.

Податоците покажуваат дека иако во некои компании платите се намалени заради кризата, во други тие продолжуваат да ги зголемуваат , што доведува до зголемување на просечните плати. Покрај тоа, компаниите отпуштаат претежно луѓе со најниски плати, што исто така доведува до зголемување на просечните плати.

За една година, платите се зголемија во скоро сите области на земјата, бидејќи просечното зголемување на платата е околу 100-110 лв. Единствен исклучок од општиот тренд е Перник, каде просечната плата се намали за 3 лева годишно на 999. Но, во споредба со нивото од минатиот месец пред кризата Ковид, дури и во Перник се зголемија платите – за 31 лева (+ 3,2 отсто).

Скоро секаде во Бугарија платите достигнуваат над 1.000 лева месечно

Просечните плати во скоро сите области на земјата се над 1.000 лева, според податоците на Националниот завод за статистика. Исклучок се само областите во Благоевград со 942 лева, Видин со 956 лева, Силистра со 966 лева и Перник со 999 лева.

Првото место според платите традиционално е главниот град со просек од 1.868 лева.