Излезе од печат книгата за деца „Славната инвазија на мечките на Сицилија“

Во рамки на едицијата „Приказни што нè обединуваат“, излезе од печат книгата за деца „Славната инвазија на мечките на Сицилија“ од Дино Буцати. Книгата е во издание на ПУБЛИШЕР, а е збогатена со илистрации од самиот автор.

Како што соопштија од Издавачкиот центар ТРИ, ова е дело кое пркоси на класичниот раскажувачки израз.

Според ТРИ, во книгата Буцати го опишува апсурдот на војната, но и едноставниот живот во планината наспроти човечката хаотичност и алчност во градот. „Славната инвазија на мечките на Сицилија“ е бајка за вечната борба меѓу доброто и злото, приказна за вистинските вредности во животот.

-Еден ден двајца ловци го крадат малото мече Тонио во планините, каде што живеат мечките. Кралот Леонцио е скршен поради загубата на своето синче, но нема друг избор освен да ја прифати тажната реалност… Доаѓа студена и гладна зима, па свесни дека нема што да изгубат, мечките ќе одлучат да слезат во градот. Војувајќи со Надвојводата на Сицилија, низ многу битки и опасности, средби со крволочни чудовишта и духови, мечките на крајот ќе успеат да извојуваат победа и да го најдат изгубениот Тонио. Но и победата има цена, се наведува во соопштението на Издавачкиот центар.

Преводот е на проф. д-р Радица Никодиновска, а книгате е поддржана од програмата „Креативна Европа“ на Европската Унија. Дино Буцати е италијански писател, новинар, драматург, либретист и сликар.

Тој во 1933 година го објавува својот прв роман Барнабо од планините, а по само две години и Тајната на старата шума. Потоа следуваат: Татарска пустина, збирката раскази Страв во скала, Токму во тој момент, Падот на Баливерна и други. Со збирката Шеесет раскази, во 1958 г., Буцати станува добитник на престижната награда Стрега. Неговите најубави раскази се објавени во збирката Продавница на тајни.