Продолжува падот на цената на нафтата на светско ниво, во Македонија поевтинија за само половина денар

Цените на суровата нафта и денеска го продолжија падот, по најголемиот неделен пад од октомври 2020 година забележан минатата седмица, поради обновените мерки за заклучување и бавниот процес на вакцинација во делови од Европа.

Американската сурова нафта ВТИ (WTI) за испорака во мај се тргуваше за пониска цена од 19 центи или 0,3 проценти на 61,27 долари за барел.

Цената на северноморската сурова нафта Брент за испорака во мај се налмали за 12 центи, или 0,2 проценти, и барел се тргуваше за 64,41 долар.

Минатата недела цената на нафтата ВТИ забележа пад од 6,4 отсто, додека Брент за 6,8 проценти, што е најголем пад за една недела од октомври минатата година, поттикнат од пад во четвртокот, кога цената на американската нафта се намали за за 7,1 проценти, а северноморската за 6,9 отсто.

Тоа беше процентуално најголема еднодневен загуба на вредноста на двте глобални референци за нафта од јуни 2020 година.

Во Македонија пак, за половина денар се намалува цената на бензините од ноќеска на полноќ, соопшти Регулаторната комисија за енергетика.

Со тоа, од полноќ, новата цена на Еуросупер БС-95 ќе изнесува 67 денари за литар, а Еуросупер БС-98 ќе се продава по цена од 69 денари за литар. Новата цена на дизелот ќе биде 56,5 денари за литар.

Екстра лесното масло за домаќинство се намалува за еден денар и неговата нова цена ќе биде 45,5 денари за литар.

Малопродажната цена на мазутот се намалува за 0,818 денари за килограм во однос на претходно утврдената цена и согласно тоа ќе се продава по цена од 35,393 денари за килограм.