Во Софија очекуваат Радев да предаде нов мандат за состав на влада, од БСП најавуваат враќање на мандатот

Бугарскиот претседател Румен Радев ќе предаде претпладнево трет мандат за формирање влада на парламентарната група на Бугарската социјалистичка партија. Одлуката на Националниот совет на БСП е веднаш да го врати мандатот, со што завршува уставната постапка за влада во рамките на 45-то Национално собрание.

Според бугарските закони, претседателот на државата ќе мора да назначи привремена влада, да го распушти Националното собрание и да распише нови избори.

Претседателот Радев попладнево ќе одржи консултации со парламентарните сили во врска со измените и дополнувањата на Изборниот законик усвоени од 45-то Национално собрание, со цел да се запознае со номинациите предложени од нив за состав на ЦИК.

Со указ, шефот на бугарската држава одобри правила за спроведување јавни консултации и постапка за назначување на составот на ЦИК.