Марш на солидарност со Палестинците во главниот град на Косово

Неколку десетици граѓани се собраа денеска во центарот на косовската престолнина, за да му изразат поддршка на палестинскиот народ во конфликтот што изби на Средниот Исток меѓу Палестина и Израел, јави дописникот на МИА од Приштина.

„Солидарност со палестинскиот народ” беше главната парола на поворката организирана преку социјалните мрежи од групата наречена „Колектив за феминистичка мисла и дејствување”.

Демонстрантите маршираа низ пешачката зона во центарот на Приштина, носејќи транспаренти на албански и англиски јазик, со пораки на поддршка за Палестинците.

Меѓу паролите кои ги извикуваа во текот на маршот беа: „Слобода за Палестина”, „Не ги допирајте децата”, „Стоп за фашизмот”, „Стоп за етничкото чистење” и слични.