Европски и хрватски новинарски здруженија со осуда за нападот на Пленковиќ кон медиумите

Европската федерација на новинари (ЕФЈ) се придружи на Хрватското новинарство здружение (ХНД) и Синдикатот на новинари на Хрватска (СНХ) во осудата на вербалните напади на премиерот и претседател на ХДЗ Андреј Пленковиќ, упатени кон медиумите и новинарите по вториот круг локални избори.

ХНД во соопштението на својата веб-страница истакна дека генералниот секретар на ЕФЈ, Рикардо Гутјерес, посочил дека е целосно неприфатливо новинарите да бидат нападнати од премиерот, но неодамна и од претседателот на Хрватска, Зоран Милановиќ.

„Да се обвинуваат новинарите е обид да се наруши нивниот кредибилитет со цел да се ограничи нивната улога”, нагласи Гутјерес.

По вториот круг од локалните избори, Пленковиќ ги обвини комерцијалните телевизии Н1, Нова ТВ и РТЛ дека непрофесионално и необјективно се однесувале кон кандидатот за ХДЗ за градоначалник на Загреб, Давор Филиповиќ.

Тој рече дека на Нова ТВ и РТЛ намерно погрешно го изговориле името на кандидатот за ХДЗ, додека коментаторот на РТЛ, професорот Дражен Лалиќ, го нарече „платеник кој доаѓа на телевизија за да ги руга кандидатите за ХДЗ” и „агитатор на левицата”.

Тој за Н1 изјави дека телевизијата „треба да постави постер за тоа каква е идеолошката телевизија”, а исто така вербално ги нападна и новинарите на таа телевизија.

Тој подоцна го нападна претседателот на ХНД, Хрвоје Зовко, поради тоа што тој го осуди премиерот за нападот врз медиумите.

Европската федерација на новинари посочи дека „недопуштени се отворените закани упатени од премиерот Пленковиќ од позицијата најмоќен човек во земјата кон сите наши колеги, како и кон медиумите кои не се на неговата и на ХДЗ идеолошка линија”.