Рама: „Голема Албанија“ е бесмислица, а „Мини шенген“ е голема работа за Западен Балкан

Албанскиот премиер Еди Рама во денешното интервју за „Јуроњуз Србија“ изјави дека „Мини шенген“ е голема работа за регионот, а идејата за „Голема Албанија“ е бесмислица сама по себе.

– Досега не сум слушнал некој да ја поддржува оваа идеја, посочи Рама.

Според него, „Голема Албанија“ никогаш не постоела на албански јазик, во учебници, но тоа е термин кој потекнува надвор од Албанија и тој е „нонсенс сам по себе“.

Решението на прашањето меѓу Белград и Приштина, според Рама, е императив и тој е навистина клучен за отклучување на потенцијалот што постои во односите меѓу Србија и Албанија.

Говорејќи за „Мал Шенген“, албанскиот премиер наведе дека не го сака „мини“ во тој израз, бидејќи тоа е голема работа за Западен Балкан и дека тој претпочита „Регионален шенген“ – „простор каде што сите можеме да ги применуваат четирите европски слободи, а во меѓувреме индивидуално да имаме свој пат кон европска интеграција“.

Според него, тоа е храбар потег што води кон подобра иднина, разбирливо е дека постојат сомневања, како во Босна и Херцеговина и во Црна Гора, каде се плашат од проектот, бидејќи сметаат дека тој е алтернатива на членство во Европска Унија.

Рама истакна дека на „ЕУ останува да одлучи кога ќе биде подготвена да ја отвори вратата за другите, а во меѓувреме, регионот не може да застане и да чека да се отвори вратата, бидејќи Западен Балкан им припаѓа на неговите граѓани, а ЕУ не може да кажува што смееме, а што не смееме да работиме“.