Санацијата на штипскиот Центар за култура ќе чини над еден милион евра

Над еден милион евра се потребни за целосна санација на штипскиот Центар за култура „Ацо Шопов", покажаа првичните пресметки на архитектите.

Новиот директор на Центарот за култура „Ацо Шопов"- Штип, Горан Трајков вели дека сега ќе се бараат пари преку Програмата на Министерството за култура, но и преку општината и Центарот за развој на Источно плански регион за изготовка на техничка документација, а потоа и средства со кои ќе се санира се што е потребно во него.

Овој објект одамна е бледа сенка, на она што беше пред повеќе од една деценија. МИА и претходно информираше дека кровот протекува на неколку места, столчињата за публиката се стари и крцкаат, а подрумот се полни со фекалии на секои поголеми врнежи од дожд. Објектот се затвара од октомври до март, бидејќи радијаторите пред неколку години исчезнаа, а крадците не се пронајдени.

-Во проектната програма што ја подготвуваме ќе треба да се изработат седум проекти. Секој проект е засебен, од санацијата на кровот, замена на прозори, греење, внатрешно уредување, столици, сцената, сценското осветлување, озвучувањето. Потребната опрема за работа на техничкиот персонал, од каблови, микрофони и се она што недостасува, вели Трајков.

Домот на културните работници и младите таленти деновиве повторно се става во функција, но ковид протоколите се уште важат за настаните во затворен простор. Центарот за култура „Ацо Шопов"- Штип е изграден во осумдесетите години на минатиот век има две сцени и спомен соба на поетот Ацо Шопов.