Кривопаланечката противпожарна единица доби противпожарно возило од Словенија

Кривопаланечката територијална противпожарна единица доби донација, противпожарно возило од словенечките колеги. Донацијата ја реализираше Доброволното противпожарно друштво од Општина Загорје на Сава, Република Словенија со посредство на Дирекцијата за заштита и спасување на Р Македонија.

Градоначалникот на Општина Крива Паланка, Борјанчо Мицевски, организираше прием за гостите од донаторското противпожарно друштво од Словенија во присуство на директорот на Дирекцијата за заштита и спасување, Беким Максути.

-Голема благодарност до доброволното противпожарно друштво од Загорје на Сава и до директорот на ДЗС, Беким Максути, за несебичната помош и соработка, како и за обезбедената донација, противпожарно возило, што е од големо значење за жителите на општината, изјави Мицевски.

Општина Крива Паланка континуирано работи на техничко опремување и кадровско екипирање на ТППЕ, Крива Паланка, со цел ефикасна и брза интервенција на припадниците на единицата.