Дел од покривната конструкција на училиштето во Миравци ќе биде заменет

Основното училиште „Климент Охридски“ од Миравци се најде на ранг листата на училишта кои по завршениот јавен повик, од страна на Министерството за образование и наука ќе добијат средства за реновирање на училишните објекти.

Од училиштето денеска соопштија дека средствата ќе ги искористат за реконструкција на покривот од источното крило на училишната зграда.

-Со реализација на овој проект значително ќе ги подобриме условите за престој на учениците, токму во делот на училиштето кое прокиснуваше при обилни дождови, а влагата во училниците од горниот кат предизвика големи штети на ѕидовите, рече директорката Васка Ефтимова, која нагласи дека на вториот училиштен кат моментно се монтира нова одводна инсталација и се опремуваат санитарните јазли со нови плочки.

Покрај ова, рече Ефтимова, со финансиски средства од сопствениот буџет, веќе е изработен и проектот за реконструкција на покривот во подрачното училиште „Ристо Динев“ во селото Милетково.