Вкупно 3.216 ученици тргнаа во основно училиште во Кавадарци, 407 од нив се првачиња

Вкупно 3.216 ученици тргнаа во основно училиште во Кавадарци, 407 од нив се првачиња. Успешна училишна година, ним и на средношколците, денеска им посака градоначалникот Митко Јанчев.

Тој информираше дека во изминатите години во сите училиштa беа реализирани повеќе инвестиции, со кои се добиени подобри услови за децата и пријатна атмосфера за престој. Континуирано се работи, додаде, на тоа сите училишта да бидат современи и да се вложува во нивниот развој.

-Драги првачиња, пред вас е еден нов свет во кој ќе запознавате многу нови работи. Вашата љубопитност секој ден ќе станува се поголема, а со тоа и желбата за повеќе да истражувате и да учите. Од денес вие сте во нов, за вас непознат свет кој ќе ви донесе многу знаење, нови другарчиња и многу поминати денови во дружба и учење. Вие , драги ученици, од денес продолжувате со редовна настава, која верувам ви недостасуваше изминатиот период. Овој нов почеток нека биде исполнет и со нови желби за надградување на вашите знаења и постигнување на нови успеси, додаде градоначалникот.

Тој се обрати и до вработените во образовниот систем.

-На вас останува најтешката задача, да ги образувате и воспитувате децата. Вие имате голема одговорност во развојот на сите деца. Ви посакувам оваа година да биде успешна за вас а со тоа и за сите ученици, рече градоначалникот.