Ќучук: Западен Балкан нема потреба од ескалација на тензиите, туку од стабилност и надежна европска перспектива

Бугарскиот европратеник од ДПС-Обнова на Европа, Илхан Ќучук, денеска беше домаќин на тркалезна маса со амбасадорите на земјите од Западен Балкан во Брисел, неколку дена пред самитот ЕУ-Западен Балкан во Брдо кај Крањ, во Словенија, јави канцеларијата на европратеникот.

Во размената на мислења со дипломатите и европратениците од групата „Обнова на Европа“ во Европскиот парламент за процесот на пристапување Ќучук изрази загриженост поради зголемените тензии меѓу Србија и Косово.

-Загрижени сме за неодамнешната ескалација на косовско-српската граница. На Западен Балкан не му требаат тензии и неизвесност, туку стабилност и кредибилна европска перспектива. Од витално значење е Белград и Приштина да покажат воздржаност и да се вклучат во конструктивен дијалог. Изминатите денови видовме случаи на насилство и одговорност е на носителите на одлуките да ја избегнат натамошната ескалација, рече Ќучук.

Исто така, беше поставено прашањето за односите меѓу Бугарија и Република Северна Македонија и можноста спорот да се реши што е можно поскоро. Ќучук ја коментираше ситуацијата и изрази оптимизам, иако двете земји се во предизборна ситуација.

-Очекувам Бугарија и Република Северна Македонија да ги намалат тензиите, да промовираат регионална стабилност и да работат заедно за конечно да се постигне сеопфатен и правно обврзувачки патоказ за нормализирање на нивните односи и почнување на преговарачкиот процес. Се уште има време до крајот на годината да имаме позитивен развој, но за оваа цел потребно е двете земји да покажат политичко лидерство и одлучност, рече копретседателот на АЛДЕ.