Отворена промотивна канцеларија на Весковски во Тафталиџе

Во Тафталиџе во Општина Карпош денеска беше отворена промотивна канцеларија на кандидатот за градоначалник на Карпош од СДСМ, Душко Весковски, каде беа поделени промотивни материјали, и се презентираа предвидените проекти во овој реон.

Весковски денеска за време на отворањето на канцеларијата најави зголемување на зелените паркови и површини.

-Во согласност со општата политика за зголемување на зелените површини и нивно редовно одржување, уште во првата година од мандатот ќе изработиме сеопфатна програма за хортикултурно уредување, реновирање на постојната и поставување нова урбана опрема и реновирање и изградба на детски

игралишта, во постојните парковите во овие две урбани заедници, рече Весковски.

Како што додаде, целта е да овозможат што почиста и поздрава околина за живот.

-Одлучни сме целосно да го искористиме овој потенцијал преку поставување и одржување на уште повисоки стандарди на хумано и планско урбано живеење, појасни кандидатот за градоначалник на Карпош.

Посочи оти неговата визија е во наредните четири години Карпош, а со тоа и Тафталиџе да се развие во општина со највисок степен на дигитализација на јавните услуги, со хумана и планска урбанизација што го штити јавниот интерес, ја почитува приватната сопственост и придонесува за економскиот развој, со највисок процент на зелени површини во градот и државата, со чисти улици по кои ќе се движат повеќе велосипеди, а помалку автомобили, со развиена социјална и културна инфраструктура.