Јорданов: Ќе субвенционираме економски оператори кои што ќе го вршат јавниот превоз, време е Штип да има јавен превоз

„Ние предлагаме во иднина да има можност да се субвенционира економски оператори кои што ќе го вршат јавниот превоз во нашиот град за да се овозможи на крајот од денот граѓаните да имаат корист од тој јавен превоз“, истакна Иван Јорданов, кандидат на ВМРО-ДПМНЕ за градоначалник на општина Штип во „Стадион“ на Канал 77.

Јорданов жали зошто досега оваа актуелна власт не се заинтересира за воведување на јавен превоз во Штип, за да можат граѓаните до градското подрачје пристигаат без проблем.

„Јавниот превоз е потреба за тоа што имавме можност со нашите сограѓани кои што живеат во подалечните населби да искомуницираме и да ја воочиме таа потреба. Затоа општина Штип има обврска по однос на ваквите дејности да субвенционира за да има можност да се воспостави еве во конкретниот случај јавен превоз“, рече Јорданов.

Јорданов додаде дека во изминатите четири години во изборната програма на СДСМ „За живот“ е ветено јавен превоз , но е реализиран. И тој со право се сомнева дека и сега нивните ветувања со кои се расфрлаат се само единствено лага напишани на хартија.

„Во програмата на СДСМ пак се ветува јавен превоз, се ветуваат убави работи за слушање но ако во изминативе четири години не бил реализиран, како да веруваме и ние како опозиција, но и граѓаните дека во следните четири години доколку ја добијат довербата од граѓаните ќе биде реализиран. Или пак зошто граѓаните да ја дадат довербата, кога претходно биле буквално излажани од СДСМ“, запраша Јорданов.

Јорданов го посочи за пример и неизградениот затворен базен кој СДСМ го ветуваше на минатите избори но не го изгради.

„Гледаме четврта година како СДСМ зборува дека ќе се гради затворен базен и дека штотуку не е пуштен во употреба. Се провлекува изградбата од избори на избори, се свикува цела свита, се сликаат, се рекламираат дека штотуку не е пуштен во употреба и така се развлекува периодот. И сето тоа остава сомнеж дека буквално нешто се прави“, појасни Јорданов.