Во Париз ќе биде објавено името на добитникот на француската книжевна награда Гонкур

Во Париз денеска ќе биде објавено името на добитникот на француската книжевна награда Гонкур, која на лауреатот му обезбедува статус на ѕвезда и подобра продажба на неговите книги, пренесоа француските медиуми.

Четворица кандидати се во потесниот круг, вклучувајќи го и писателот од Сенегал, Мохамед Мбугар Сар. На листата се и Сорј Шалендон, Кристин Ангот и Луис-Филип Далемберт.

Минатогодишниот победник е Ерве Ле Телиер за романот „L’Anomalie”.

Наградата Гонкур се доделува од 1903 година, а победникот го одлучува жирито кое секоја година се состанува во познатиот париски ресторан „Друан”. Наградата е именувана по писателот Едмонд Гонкур (1822-1896) кој ја основал книжевната академија Гонкур. Оваа награда, меѓу другите, им беше доделена на познати писатели – Марсел Пруст, Андре Малро, Симон де Бовоар и Маргарит Дирас.