Во Словенија од понеделник нови мерки за пандемијата, но нема заклучување на земјата

Словенечката Влада, во обид да го ограничи брзиот раст на епидемијата, ноќеска усвои голем број нови рестриктивни мерки, но не се одлучи за заклучување, како што препорачаа некои експерти од здравството, чии капацитети за пациентите со Ковид-19 се на работ на издржливост.

Новите мерки стапуваат на сила од понеделник, а меѓудругото опфаќаат скратување на работата на кафеаната и забрана за собирање луѓе кои не се членови на исто домаќинство.

Возрасната граница за лицата кои мора да имаат сертификати за ПВТ (преживеани, вакцинирани, тестирани) е намалена од претходните 15 на 12 години, а потврдите за Ковид-19 ќе се сметаат за валидни само со идентификација со личен документ.

Угостителските објекти ќе можат да работат, при што нивното работно време ќе биде скратено и ќе трае од 5 до 22 часа, а гостите ќе смеат да служат само на маси и на соодветно растојание.

За секој посетител потребно е да се обезбедат најмалку 10 квадратни метри простор, во продавниците на влезот треба да се означи колку луѓе можат да бидат истовремено внатре, платнените маски повеќе не можат да се користат, туку мора да бидат хируршки или тип FFP2 , соопшти владата по седницата, која траеше до доцна во ноќта.

До ново известување, сите ноќни клубови и дискотеки се затворени, на јавните културни и спортски настани посетителите мора да бидат на седишта со соодветно растојание, а условот за ПВТ и маските се задолжителни за присуство на верски церемонии како и растојанието меѓу верниците.

Владата не се определи за онлајн настава во училиштата, но наложи од понеделник, 15 ноември, учениците да се тестираат за коронавирус три пати место двапати неделно, како што беше досега.

По вонредната седница на владата за заклучоците говореа епидемиолозите и министерот за здравство, Јанез Поклукар, а не премиерот Јанез Јанша и двајца вицепремиери, како што беше најпрво најавено.

-Здравствената состојба во земјата е алармантна и сметаме дека мерките што ги донесовме ќе имаат брз ефект врз епидемијата. Следните недели ќе бидат тешки и здравствената заштита ќе биде ставена на тест. Единствена вистинска ефикасна мерка во сегашната ситуација може да биде вакцинацијата, нагласи Поклукар во изјавата по седницата.