Франција му враќа на Бенин кралско богатство украдено пред 130 години

Франција денеска свечено му врати на Бенин 26 предмети од кралското богатство Абомеј, ограбени од колонијалните трупи во 19 век.

Министрите за култура на двете земји, Розелин Башело и Жан-Мишел Абимбола, потпишаа договор во Елисејската палата за пренос на сопственоста на предметите, кои утре ќе му бидат вратени на Бенин по 130 години.

– ТОА Е ДОЛГООЧЕКУВАН СИМБОЛИЧЕН, ТРОГАТЕЛЕН И ИСТОРИСКИ МОМЕНТ, ИЗЈАВИ ФРАНЦУСКИОТ ПРЕТСЕДАТЕЛ ЕМАНУЕЛ МАКРОН, КОЈ ВО 2017 ГОДИНА СЕ ОБВРЗА ДА ГО ВРАТИ НАСЛЕДСТВОТО НА АФРИКА.

Претседателот на Бенин, Патрис Талон и се заблагодари на Франција за враќање на културното наследство.

– НО, ВРАЌАЊЕТО НА ОВИЕ 26 ДЕЛА Е САМО ПРВАТА ФАЗА, НАГЛАСИ.

Меѓу делата што треба да се вратат утре, а кои беа изложени во музеј во Париз, се тотемските статуи на поранешното кралство Абомеј, како и тронот на кралот Беханзин, ограбен од француските колонијални трупи за време на грабежот на палатата Абомеј во 1892 година.

Експертите веруваат дека меѓу 85 и 90 отсто од африканското наследство е надвор од континентот. Од 2019 година, покрај Бенин, уште шест земји, Сенегал, Брегот на Слоновата Коска, Етиопија, Чад, Мали и Мадагаскар, поднесоа барања до Франција за враќање на наследството.

Враќањето на уметничките дела е карактеристика на „новиот однос“ што Макрон сака да го воспостави со Африка.