Курти: Името „Отворен Балкан“ е погрешно и лажно

Косовскиот премиер Албин Курти изјави дека неговиот став за иницијативата „Отворен Балкан“ на премиерите на Северна Македонија и Албанија, Зоран Заев и Еди Рама и на претседателот на Србија, Алексадар Вучиќ, е непроменет дека таа иницијатива е штетна за Косово, јави дописникот на МИА од Приштина.

Во денешното обраќање пред медиумите, Курти рече дека „и самото име на таа иницијатива е погрешно и лажно“.

На прес-конференцијата, на која го претстави новиот министер за здравство на Косово, Рифат Љатифи, Курти се осврна на резултатите на партијата која тој ја води, владејачкото Движење самоопределување (ВВ) на штотуку завршените локални избори, за кои ја повтори оценката дека се „незадоволителни“.

Според него, слабиот резултат што го постигна ВВ на иборите, на кои победи во само четири од 38-те општини во земјата, е последица на „внатрешни структурни и организациски дефекти“.

– Она што е веќе јасно е дека во нашиот политички субјект, кој порасна енормно во последните 3-4 години, има внатрешни структурни и организациски дефекти. Немаме структури кои одговараат на големината. Има внатрешни дефекти, изјави Курти.

Според него, на резултатот на изборите влијаело и тоа што сите други партии се обединиле против ВВ.

– Постоеше едно обединување на сите субјекти против ВВ. Постоеше паника кај опозицијата, поради што се обединија против ВВ, рече Курти.

Кандидатите за градоначалници на албанските опозициски партии победија во 23 општини, вклучително и престолнината Приштина и повеќето поголеми градови, како Призрен, Урошевац, Митровица, Ѓаковица, Пеќ и други. Партијата на Курти, која е на власт откако на парламентарните избори во февруари годинава освои над 50 отсто од гласовите, на локалните избори победи само во Гњилане, како нешто поголем, и во уште три помали градови. Најголемата партија на косовските Срби, Српската листа, ги освои сите десет општини со мнозинско српско население, а во уште една општина победи Деморатската партија на Турците.

Првиот круг локалните избори 2021 во Косово се одржана 17 октомври, а вчера се прегласуваше за градоначалници во 21 од вкупно 38 општини, колку што има во државата.