Саакашвили изгубил свест по седум недели штрајк со глад во затвор

Адвокатот на поранешниот грузиски претседател Михаил Саакашвили, кој веќе седум недели штрајкува со глад во затворот, денеска изјкави дека неговиот клиент паднал и изгубил свест.

Адвокатот Бека Басилаја изјави дека бил во посета на Саакашвили во затворот кога тој колабирал и потоа на носилка бил однесен од собата за посети, но и дека неговата состојба е стабилна, пренесуваат американските медиуми.

Лекарската комисија формирана од Канцеларијата на јавниот правобранител денеска соопшти дека здравјето на Саакашвили се влошува и дека тој треба да биде префрлен од затворот во цивилна болница, каде што може да добие соодветен третман, бидејќи комисијата утврдила дека поранешниот претседател на Грузија боледува од бубрежни и невролошки заболувања.

Саакашвили ја напушти Грузија во 2013 година и замина во Украина, а подоцна беше осуден во отсуство за злоупотреба на службената положба и осуден на шест години затвор.

Тој беше уапсен на 1 октомври, откако претходниот ден се врати во Грузија непосредно пред локалните избори, со цел да ги поддржи опозициските сили.