Во Минск приведени 11 лица кои се исмејувале со смртта на руски војници

Белоруската полиција приведе 11 лица поради навредливи коментари на социјалните мрежи во врска со смртта на двајца припадници на руските паравоени сили за време на воена вежба во Белорусија во ноември.

Претставници на Министерството за внатрешни работи за борба против организираниот криминал и корупцијата приведоа 11 граѓани поради објавување „навредливи и непријатни коментари полни со цинизам“ за неодамнешната смрт на двајца руски паравојски за време на вежба, изјави началникот на полицијата Вјачеслав Орловски на каналот Телеграм.

Според него, уапсените се однесени во притвор и ќе бидат изведени пред суд поради ширење омраза и непријателство.

Тој рече и дека уапсените ќе бидат обвинети за екстремизам.

– НАЈГОЛЕМ ДЕЛ ОД НИВ СЕ СОЦИЈАЛНО НЕУСПЕШНИ, НЕВРАБОТЕНИ, ТЕШКИ АЛКОХОЛИЧАРИ СО КРИМИНАЛНО ДОСИЕ, РЕЧЕ ОРЛОВСКИ.

Прес-службата на Министерството за внатрешни работи на Белорусија додаде дека полицијата го утврдила идентитетот на повеќе од 50 лица кои објавиле навредливи коментари против руските војници.

– НЕКОИ ЈА НАПУШТИЈА ЗЕМЈАТА И ПРОДОЛЖИЈА ДА ПИШУВААТ ЦИНИЧНИ КОМЕНТАРИ ОД САД, ПОЛСКА ИЛИ ЛИТВАНИЈА, СЕ ДОДАВА.

Двајца руски војници загинаа на 12 ноември, кога нивните падобрани се заплеткаа при слетување на стрелиште во западна Белорусија.