Лидерите на Израел, Грција и Кипар се договориле да ја зајакнат соработката во повеќе области

За зајакнување на соработката, унапредување на заедничките интереси и за заедничка соработка за мир, стабилност, безбедност и просперитет во Медитеранот и поширокиот регион, се согласиле премиерите и Грција и Израел Кирјакос Мицотакис и Нафтали Бенет и претседателот на Кипар Никос Анастасиадис по трилатералната средба одржана во Ерусалим, јави дописничката на МИА од Атина.

Во заедничката декларација по состанокот, тројцата лидери истакнуваат дека трилатералната соработка меѓу Израел, Грција и Кипар „претставува центар на заеднички интереси што ги поврзува Европа, Источниот Медитеран и Блискиот Исток“, а се осврнуваат на сите прашања за кои станало збор: надворешната политика, климатските промени, соработката во енергетскиот сектор, пандемијата.

Велат дека потребна е „дипломатија што гради мостови“ и изразуваат решителност да го постигнат тоа.

Додаваат дека очекуваат интензивирање на соработката со САД со цел планирање учество на политичко ниво на некоја од следните средби.

Осудуваат секаков вид тероризам и поттик на насилни активности и ја повикуваат меѓународната заедница заедно да работи за ограничување на движењето на терористите

Лидерите на Израел, Грција и Кипар, според декларацијата, го сметаат енергетскиот сектор, а особено природниот гас и обновливите извори на енергија, како цврста основа за соработка во регионот, „врз основа на меѓународното право, вклучувајќи го и морското право и почитувањето на права на сите држави да ги остварат своите суверени права во нивната ексклузивна економска зона/континентален гребен“.

-Убедени сме за потребата на нашата трилатерална соработка и ќе продолжиме тесно да работиме за целосно да ги искористиме сите можности во корист на нашите земји и нашите народи, како и на поширокиот регион, пишува во декларацијата.

Тројцата лидери се договориле, следната трилатерална средба да се одржи на Кипар во втората половина на 2022 година.