Михајловиќ: Протестите против Отворен Балкан се дело на екстремисти кои сакаат регионот да го вратат во минатото

Вицепремиерката на Србија, Зорана Михајловиќ, изјави дека протестите организирани денеска во Тирана по повод посетата на претседателот на Србија и иницијативата Отворен Балкан покажуваат дека сè уште има политички сили во регионот кои гледаат корист од обидот за враќање на регионот во минатото, јави дописникот на МИА од Белград.

– Целите на иницијативата „Отворен Балкан“, што ја покрена српскиот претседател Александар Вучиќ, заедно со премиерите на Албанија и Северна Македонија, се поврзување, побрз економски развој и подобар живот за луѓето кои живеат на овие простори. Противењето на оваа иницијатива директно се спротивставува на интересите на граѓаните од целиот регион, кои пред сè сакаат мир, стабилност и подобар живот. Тоа не се постигнува со кревање тензии, туку со решавање на проблемите со дијалог и соработка за оние прашања каде што имаме најмногу заеднички интереси, а тоа се инвестициите и инфраструктурните поврзувања. Во таа смисла, Отворен Балкан е иницијатива за подобра иднина на регионот, а екстремистичките реакции на него се обид да се врати регионот во минатото, изјави во соопштението за јавност српската вицепремиерка Зорана Михајловиќ.